अनेकसप्ताहानां प्रतीक्षानन्तरं माता वैष्णोदेवी यात्राऽद्य पुनः आरब्धा अस्ति। जम्मू-कश्मीरस्य रियासी-जनपदे स्थितं पावनं तीर्थस्थानं यत् महाभूस्खलनकारणेन प्रायः द्वाविंशतिदिनपर्यन्तं निरुद्धं जातम्, अद्य पुनः श्रद्धालूनां कृते उद्घाटितम्। एषः निर्णयः नवरात्रेः शुभसंध्यायां समागतः, येन देशविदेशेभ्यः आगतानां भक्तानां मध्ये आनन्दतरङ्गः प्रसृतः।
भूस्खलनकारणेन यात्रामार्गः अवरुद्धः आसीत्– अगस्तमासस्य अन्ते अर्धकुमारीप्रदेशे महद्भिः भूस्खलनैः महान् विनाशः जातः। अस्मिन्नेव आपत्तिकाले चतुस्त्रिंशत् तीर्थयात्रिकाः मृत्युम् आसादयन्, बहवः अपि घायिताः। तेन कारणेन यात्रामार्गः सुरक्षा-निमित्तं तत्क्षणमेव निरुद्धः। तदानीं प्रभृत्य सम्बन्धितविभागैः मार्गस्य पुनर्निर्माणकर्म निरन्तरं कृतम्।
पुनः आरब्धा तीर्थयात्रा– श्रीमाता वैष्णोदेवी श्राइन-बोर्डेन १७ सितम्बर् २०२५ दिनाङ्के यात्रामार्गस्य पुनः उद्घाटनं घोषितम्। बोर्डेन भक्तान् प्रति आवेदितम् यत् यात्रासम्बद्धाः अधिकृतवार्ताः केवलं अधिकारिक-मार्गेषु एव ग्राह्याः स्युः। यात्रायाः पुनः आरम्भेनेव कट्रायां आधारशिविरे महती भीः श्रद्धालूनां समागता, पञ्जीकरणकक्षेषु दीर्घाः पङ्क्तयः अपि दृष्टाः।
भक्तानां आग्रहः तथा विरोधः – यात्रामार्गस्य उद्घाटनात् पूर्वं कतिपयः श्रद्धालवः यात्रायाः पुनः आरम्भं प्रति कट्रायां प्रदर्शनं कृतवन्तः। सुरक्षा-निमित्तं यात्रा पूर्वं स्थगिता आसीत्, किन्तु भक्तानां निरन्तरं वर्धमानसमूहं दृष्ट्वा, तेषां च आग्रहान् विचार्य, अन्ततः बोर्डेन यात्रायाः अनुमतिः दत्ता। तथापि यात्रिकेभ्यः सावधानता-पालनं नियमपालनं च अवश्यम् इति उपदिष्टम्।
वातावरणस्य प्रभावः तथा सावधानानि– जम्मू-कश्मीरप्रदेशे अद्यतनदिनेषु प्रबलवृष्टिः, मेघविप्लवः च जातः, येन सर्वे प्रदेशाः प्रभाविताः, यात्रामार्गः अपि बाधितः। अधुना तु अनुकूलं वातावरणम् अस्ति, तथापि प्रशासनैः यात्रायाम् विशेषं जागरूकतां पालनं आदेशितम्।
भक्तानां उत्साहः – यात्रामार्गस्य उद्घाटनेनैव भक्तानाम् अन्तः अपारः उत्साहः समुत्पन्नः। नवरात्रेः शुभसन्ध्यायां मातृदर्शनस्य सौभाग्यं प्राप्तुं देशविदेशेभ्यः भक्ताः कट्रां प्रति आगच्छन्ति। एषा यात्रा केवलं धार्मिकश्रद्धायाः प्रतीकः न, अपि तु श्रद्धालूनां जीवनस्य सुखशान्तेः मनोबलस्य च संवर्धकः।
About The Author
